熱血時報 | 購物就購物，唔好白白送死 | 張樂行 | 專欄部落
因為匈奴實在太好打，係歷史上，只有極少數人夠匈奴打。戰國時代趙國李牧將軍係其中一個。李牧係世界公認嘅超級軍事天才。點解？因為征戰連年，卻未嘗一敗。而佢嘅對手，從來都係非等閒之輩，例如匈奴同秦國。而李牧打匈奴嘅方法好簡單，就係──唔打。
匈奴一來犯，全軍退守入城中堅守，唔准出迎應戰。出迎者，斬。空閒嘅時間，李將軍出名對士兵好，晚晚慰勞軍隊，請佢哋鋸牛扒（我講堅架，史書係咁寫架）。如是者打咗好多年。人人都以為李將軍係淆底唔敢打。所以後來將佢調職。換另一個將軍代替李牧抗匈奴。新將軍一上任，每次匈奴嚟就打。一打就輸。再打再輸。幾年間損兵折將，死傷甚多。不單止咁，由於戰事頻繁，邊境農作要全面停止。民不聊生。
後來，李牧重新上任。堅持佢嘅死守原則。十幾年來，竟然無傷過一兵一卒。仲要晚晚有Party開──鋸扒。同時，日日訓練士兵，積極改良軍備。終於，兵強馬壯、裝備精良、士氣旺盛。李牧見時機成熟，親率精兵出關。大敗匈奴。匈奴往後十幾年都唔敢騷擾邊境。
而家，幾乎你一同差佬口角，係口角啫，佢就會拉你。我哋唔好同佢地口角，唔好同佢哋有身體接觸。唔好畀籍口佢拉你。我哋係良好市民，我哋係去旺角購物姐。購物就購物，唔好主動挑機，唔好係呢啲時候白白送死。我地要畀啲紀律。過馬路就正正直直，光明正大咁過。記住，我哋只要一人多，我哋已經贏咗，因為我哋增加緊政府嘅管治成本。唔好係贏緊嘅時候，白白斷送人命。仲有，我真係建議大家去波鞋街購物，其實你哋知唔知，波鞋街買野有條潛規則，基本上大部份野都照價八折，唔使撻朵都有八折。我係唔明點解唔去波鞋街購物。（當然，如果你捉埋我去，等我亮一亮相，七折。）
另外，我哋而家係以人肉擋政府部隊。死嘅死、傷嘅傷、拉嘅拉。不智。點擋政府會好啲？你哋一定比我更加有計啦。我教英文架咋嘛我，我識條鐵咩。我只係知道，好打如名將李牧將軍，都唔敢貿貿然出去打匈奴。人哋咁叻都要花時間升級自己啲裝備，先敢出去同人打。我哋，冚家鏟，好話唔好聽，平民嚟架咋嘛。下下用肉身擋大炮，玩咩。自己想辦法，搵野擋啦。尋晚一役，證明咗用人肉擋，係不智！
（編按：作者為彌敦道佔領區義教英文老師。）
沒有留言:
張貼留言