反送中運動至今已持續超過 100 天，民間爭取的除了「五大訴求」，還有對香港警隊所作所為的調查與譴責。
這星期，警務處處長盧偉聰向警務人員發表公告，形容過去 100 日「是他在警察生涯中最難忘的一段日子」，又稱將會於警隊歷史上留下「不能磨滅的印記」。他又安慰同僚，管理層會採取一切可行措施，照顧同事的福利及家庭需要，「力求讓大家能夠在無後顧之憂的環境下履行職務」。
盧偉聰
這 100 天，香港警察做過的事，很多人在媒體鏡頭、直播片段中看得一清二楚，然而面對這場運動（或他們理解的「暴動」），香港警察究竟在想什麼？
為了解警員心態，反送中運動爆發至今，《立場新聞》三次訪問現役警員阿峰（化名），訪問分別於 6 月中（6.12 衝突後）、6 月底（示威者兩度包圍警總後）及 8 月底進行。
阿峰在警隊任職多年，亦接受過機動部隊訓練，但這場運動他沒有在衝突前線執勤；他只是三萬人警察隊伍的其中一員，意見亦絕不能代表所有警務人員，但透過他的自白，我們至少可一窺這 100 天於鏡頭以外，香港警察在想的是什麼——即使大家未必同意。
（下文經由《立場新聞》記者整理三次訪問內容，以第一人稱寫成。文中的「我」是受訪者警員阿峰。）
* * *
「社會衝突警隊埋單」
現在警隊的氣氛，其實都幾得意。明明仍是非常時期，但大家好像都慣了這是常態。照理這不應是常態，無理由日日預咁少人返工，大多數同事都要出去做暴動。
以前我們每更返 8 小時 45 分鐘，現在每更 12 小時 45 分鐘。返多咗嘅，可以揀放假或者補錢。一開頭有些同事雄心壯志，話梗係唔放假，賺多啲，但過一排，大家都攰啦。
之前出去做暴動的同事，會好興奮咁返嚟分享出面的所見所聞。現在少咗。可能因為講來講去都係，射幾個催淚煙，搞幾輪，拉幾個人。開頭好似好特別，現在不是了 — 其實大多數香港人都係咁啦，慢慢會麻木。
《逃犯條例》呢件事會搞到咁大，我係好 surprised 嘅。
其實打得警察呢份工，大多都係支持政府，就算唔支持都會扮支持啦，但今次件事開始的時候，只講條例，真係不太多人支持。喺警署大家講開，或者 canteen 電視播開講兩句，我聽唔到有人話，「梗係要立啦！呢啲仆街要拉！」無聽過類似的說話。
甚至 6 月 9 日前，我聽到好多同事吹水講，唉其實政府係咪真係要咁急推呀，台灣都話唔駛啦。咁急推，啲人反抗會好大。我自己都係咁諗，明顯無迫切性你又要咁樣搞，社會就會有衝突，社會有衝突咁邊個埋單？咪警隊埋單囉。
我覺得今次我們被人 put on the table 仲嚴重過佔中。我唔知林鄭月娥係咪有 intention 跣警隊一鑊，但你係將警隊放在一個磨心位，喂大佬，條《逃犯條例》又唔係我話立，係你要立嘛阿姐，你自己出嚟同人解釋啦。
但我們食君之祿擔君之憂，係咪先？我收你人工，無辦法就要被你夾上轎。
反送中 6.12佔領中的持槍警察
* * *
「Training 係咁教」
網上好多人話警察好暴力乜乜，喂，我們往往睇返，即使喺 facebook、甚至主流媒體 replay 出嚟的片段，成日都斷章取義，你攞住後面嗰 part 出嚟講，咁梗係警察錯啦，好似無端端狂揼人，但你冇咗頭 part 喎。
所以我的同事係非常之嬲嘅，整個氣氛都唔好，因為呢堆被剪輯過的片段，不斷在這個世界流傳，以至好多無去過現場的人，或者有去但企得好後、唔知發生咩事的人，都覺得差人係癲嘅。
我明白對一些無受過警察訓練的人來說，會覺得好 ridiculous。但我們的訓練係咁樣嘅：once 警務處處長宣布呢場係暴動的時候，在現場 appear 的所有人都係暴徒，我們唔會再推測，呢個人係咪善意。因為一旦進入暴動的模式，就再唔係警察對一個人的場面，而是一個大型的活動，簡單來說，就是 battle 和 war 的分別。
處理暴動的 training 係無差別的，唔會針對你掟過嘢，所以我揼你，你無掟過嘢我就請你離開 … 一定無差別的，因為武器的設計就係無差別，催淚彈。當警務處處長宣布得暴動，要驅散，根據我們的 training，你企喺度，甚至跪喺度，都已經唔可以容許。因為我們在現場，只有一對眼望住前面，唔會知道後面發生咩事，可能你唔去揼前面無端端坐喺度嗰條友、唔射支煙過去，會引發後面好大的問題。
你話呢個準則合唔合理，我唔識答。但我們別無選擇，必須咁樣做。
作為警務人員，你要信呢套訓練會 work。你出人工就係做這件事。你唔會諗，佢好慘喎，我們可否同情佢？如果有同事在現場，見到有市民只不過企喺度狂鬧警察，於是覺得「點解我要向佢射催淚煙？唔勸佢走？」… 如果一個受過完整機動部隊訓練的同事，仍講出這句說話，我覺得係非常不成熟的警務人員。這個人也不適合做警察 — 佢唔係壞人，甚至係好人添，但這份工真的不適合佢。
你事後覺得我今日好罪惡，要辭職，fine；但係大佬呀，你唔係低人工嘛，三皮幾四皮嘢一個月，真係因為你叻仔咩？就係買你忠心之嘛。
* * *
「暴動 mode」的源頭
聽到不少人說，為何香港警察突然變成這樣的？每次一進入「（處理）暴動 mode」，每個警員的行為、動作、反應，以至情緒，都好像變了另一個人。
我想，這個跟我們接受的訓練有關。例如以前在學堂，七成時間都在練步操，教官會要求一講一個口令，就進入另一個模式去操；另一個訓練是，夜晚全部人訓哂覺，教官會靜雞雞入嚟，捉走其中一個 — 當然唔畀佢出聲啦 — 然後睇下捉走幾多個，班學警先發覺。
這些訓練好改變到我。我們慢慢會進入一個狀態，無論任何時間都要好有 alertness。
機動部隊訓練就更加。它的成立、就係要處理公眾集會，甚至暴動。出學堂之後，我哋會去唔同環頭工作，大多數同事在半年至兩年之內會被召入機動部隊，接受為期三個月的訓練，大部分都係防暴的訓練。
機動部隊訓練係比學堂辛苦 100 倍，好 Q 辛苦。因為大部分時間都放在體能同戰術訓練上面，舉啞鈴、掌上壓、跑步就唔提了，重中之重就是防暴操，著哂三、四十磅的防暴裝備上身，在烈日當空之下受訓，而且是好密集式的訓練。教官好嚴格，由你入去第一日，屌到你出去嗰日，每樣嘢都會同你計時，例如燒煙前要防毒面具，25 秒要全個隊完成哂 — 聽落好簡單？但一隊人唔可以全部一齊上 mask，否則戴緊時會被人打。25 秒，係分批完成哂。
又例如有種訓練叫 ETO，emergency turnout。成班人本來在更衣室好優悠自在，食緊雞，聽緊收音機，突然有人走入嚟嗌 ETO，成班人就要跑住咁著衫，落去攞槍，短時間內上哂 gear，隨時上車行得，呢個訓練係成日做的。
例子仲有好多。和平集會，我們的模式係點；暴動的，模式又係點。教官一聲號令，就要轉。有時明明叫你去一個方向跑，叫一聲就全班人 180 度轉 … 全部訓練，都要你在短時間內進入另一個狀態。
還有，PTU（機動部隊）成日講一樣嘢，叫「震懾力」，所以你成日會見到同事黑起塊面、爆哂粗，somehow 可能佢不是太嬲，但會 appear to be 一個好有震懾力的狀態，這也是 training 的一部分。當然有好多同事收工都轉唔返 mode，咪有好多家庭悲劇發生囉。
我年輕時受訓，當時香港社會氣氛無咁複雜，我仲好肯定，練完呢套嘢，一世都唔會用啦。我的同事、上級都係咁講：你練啦，滿足下啲 staff 啦，反正一世都唔會用啦。當時我也會幻想下，第日兵荒馬亂，就會以英雄姿態、正義之師咁平息暴亂 … 我無乜諗過，呢件事係啱唔啱。
隨著年紀漸大，我會諗，一個社會係咪需要一班防暴警察？個人覺得任何社會都需要。好似一把槍，擺喺度你可以用來打獵，你可以用來殺人，把槍係唔會決定前面的目標應否被射擊，而是揸槍的人怎去用。
所以我不覺得暴動訓練有何問題，而是決策的人怎去使用 — 這才是問題。
* * *
「拖垮警隊太天真」
有些事我是想解釋一下的。
出面講到警察形象好似好差，但對我每日工作有無明顯影響呢？其實好少。
你做前線警察就會知，真的好像平行時空一樣。出面示威暴動講到好憎人差人，但你每日行街，香港人真係好得意，佢哋好似變返馴良的市民。
有一個例子。我間差館雖然唔係「大港」（即旺角、尖沙咀等大警署），但之前都被人圍過。圍完，第二日有超多街坊送嘢嚟，幾乎每個鐘都有人，卡呀，花呀，係有李偲嫣之流，但更多是平民百姓，有三十歲出頭的買個禮盒過嚟，仲有個阿婆，大熱天時，帶咗啲烚好的雞蛋，還有一箱水 … 你話佢係親中愛國團體策動？我點都唔信。
所以係咪新聞所講，地區街坊都好討厭差人，真係未必是一面倒。甚至有些同事會說，這些才是真街坊；平日夜晚那些，是示威者扮的。
另一個誤會是，有些暴徒話想拖垮警隊。我想講，警察攰就係梗係有，但如果他們真係咁諗，其志可嘉，但未免太天真。你要知道，我們係出住幾皮嘢人工，有政府公帑 support，出入有冷氣車，仲有精良裝備。攰的話，警隊會安排冷氣地方給我們睡覺，每日有免費飯盒食 … 我們是這樣跟他們打消磨戰的。
六月底有人包圍警總。我識得一些同事，當時在警總入面 standby。佢哋話好爽，咩都唔駛做，日日食雞、上網，糧水又充兄 — 警察總部有四萬個杯麵，全部大碗裝、十幾蚊的出前一丁。大家以為佢哋一定係含辛茹苦咁守護警總，但原來咁輕鬆。
621包圍警總
* * *
「無見過基層咁憎管理層」
發展到今時今日，我們當然好憎示威者 — as worse as 示威者睇差人囉，100% 同事都會叫佢哋做「曱甴」。
但好多基層同事，包括我，同樣好憎管理層，即係警務處處長、副處長等。
大家一向都唔鍾意盧偉聰，6 月 12 日之前嗰秒，都仲覺得佢係一個廢柴，睇死佢實舉棋不定，但 6.12 之後，其實係有改觀，因為佢今次真係果斷咗，好快就宣布暴動。如果上次旺角騷亂佢係 0 分，6.12 令佢至少加到 50 分。
但之後又跌返落去。轉捩點係第一次圍警總，好多同事都好嬲，唔係嬲示威者包圍，而係嬲點解警隊管理層容許呢件事發生，呢個不單關乎士氣、尊嚴，警隊是緊急服務的機構，總部被包圍，在其他地方已是緊急狀態，點解管理層唔做嘢？唔係不能，係不為。於是好多同事大惑不解，氣氛變到非常差，好憎恨管理層。
之後 6 月底，管理層做過好多嘢，上面幾隻神獸（處長、副處長、高級助理處長）係咁發信，話會好保護每位同事，而家咁做，係因為打緊一場仗云云，又有高層不停走訪唔同警署，但講真，無可能可以平息到警察的憤怒。我真係未見過基層咁憎管理層，講粗口就必然啦。
而家每日記者會，眼見到佢哋拙劣的溝通技巧，真係聞者傷心聽者流淚，我真係覺得不如唔好講啦。
憎管理層仲有好多原因。更重要是他們的決策失誤，不時令到夥計落單，陷入危險的局面。例如機場那單（8.13），好彩夥計無掹槍連隨開一飛，呢個你無得怪佢，被人打到咁樣，分分鐘會死嘛，但之後示威者的情緒會更加激進。
如果開咗槍，呢個完全係 RRC（Regional Response Contingent，總區指揮大隊）的問題，係你擺佢喺一個無得選擇的 position，明明應該可以避免的。
不過，雖然對上頭好多不滿，但「屌住做」一向都是警隊文化。你話警隊多唔多牢騷？好多，多到如果你齋聽佢講嘢，唔睇佢做嘢，會以為警隊就嚟滅亡、叛變；但口裡說不，身體卻很誠實，警隊的特質係「屌住做」，你 order 嚟到，就唔會再諗乜嘢，事後做完又屌，下次又做。你話會唔會有一日會爆？真係答你唔到，但警隊近 200 年都未爆吖。
* * *
警察誓詞第一句
以前我好緊張警隊形象，但近年會諗，以前香港警察形象好只是 bonus，因為全世界沒一支警隊形象係好。
好多人有個美麗誤會，警隊當然有一部分職能是服務市民，塞車就告車，你被人偷嘢就幫你捉賊，你唔見咗個仔就幫你搵返。但亦有好大部分職能，其實係擁護政權。點解我們要做防暴演習呢？防暴本身已是維護政權的行動。市民出來暴動，其實是反映對政權的不滿嘛，如果單純是服務市民，唔好話幫佢，至少唔應該阻止。
但警隊點解要做防暴演習？要有防暴隊？基本上就係擁護政權。我們一向都是政治工具，你鍾唔鍾意都好，這是客觀事實。
這三個月，好多人拎返香港警察誓詞出嚟，話咩「不畏懼、不徇私、不對他人懷惡意」… 其實大家知唔知香港警察誓詞第一句係咩？
係「本人會竭誠依法為香港特別行政區政府效力為警務人員」— 無論如何，我們都是擁護香港特別行政區政府。無呃你啦。
阿峰手執警員委任證。
