義載

分享其中一次義載故事：

（多字!勿插!）

去過三次義載，我無加入telegram群組，純粹隨機性响馬路接人。請容許我省略日期時間地點，因為我覺得以上都唔係故事重點，重點係我車上嘅幾位女義士。經一番交流同善意表達後三位女義士終放下擔心坐上我車，三個女仔滿頭大汗，我無直接吸過催淚煙，所以我對其氣味無概念，佢哋幾個應該係走得幾前，幾位上車後好快我就感覺極刺鼻，我諗係因為佢哋身上殘餘嘅催淚煙所致。

「我知你哋擔心緊d咩，我拆車cam，手機俾你揸住，但你幫我睇地圖，你哋就望實蘋果動、FB睇下邊條路有roadblock。俾埋身分證、住戶證、員工證你哋影，放心，我真係同路人嚟。」

跟住落黎所發生嘅事教我一生難忘...

講details少少先，我嗰部係細揭背車，坐滿人其實都幾迫，車頭乘客同司機相距半隻手臂，隔離做緊咩兩邊都睇得好清楚。

我預備咗濕紙巾、葡萄適、餅乾、尿袋、男女裝嘅衫褲襪，自從第一次出入義載，有個義士响公路中途反胃，停兩次車俾佢嘔咗先。所以打後就知道要放埋膠袋响車。我無問點解，但我估佢唔係因為食錯嘢嗰種嘔，係極度緊張後嘅反應。

「架車我裝曬四邊窗網，我落車等你哋換咗先。」但坐車頭嗰個秒回我：「唔好唔好唔好，好想返屋企，即刻開車走」我話👌，而家即走，放手制、油門都未掂實，三個女仔已經直接換衫。我有諗過應該點演繹呢個插曲，我擔心嘅係怕d廢藍扭曲故事，安插污名俾年青女抗爭者，我想表達嘅係佢哋三個當刻係幾咁恐懼黑警，恐懼到一個頂點。然後，大概用咗個半鐘就完成我嘅任務，路上無遇到半個黑警。途中大家無點講嘢，但我知道佢哋都勁攰，個頭鐘下鐘下咁訓。每個都有同我講多謝，多謝義載司機，感激所有義載司機。當去到最後一個女義士屋企附近，嗰個女義士臨落車時，同我咁樣講：「唔好意思，頭先我哋食餅整到地氈好多餅碎，麻煩要你幫我哋清乾淨。」當下我無為意，返到停車場想話拎地氈出嚟櫈下，見唔到一地餅碎，而係一地碎紙 ... 其實我長篇大論咁post出嚟，係想講响黑警口中所謂嘅曱甴、暴徒，係我呢世仔眼見過最美麗嘅嘢。

⌘ 從我的 iPhone 傳送 ⌘