義載

(轉載)

我自己係一個和理非，家庭負擔重，唔可以同年輕人係街頭並肩，唯有每次有抗爭後，都出車去到現場，希望送得一個得一個，盡能力令年輕人平安返到屋企。

出車咁多次，開頭都想接到有D人，感覺係付出咗，出車有D意義…但出多幾次，就最想係食白果，無人需要義載，大家都有辦法離開現場，個心就安樂了。

載咁多次，都有D小朋友傻瓜到話畀返油錢我，不過每次都畀我鬧：你好有錢呀，有錢就留返食飯，我有錢過你，你認承我，不受傷，不被捕，好好保重，知唔知。

有個年輕人就收返起D錢，好嘆息咁講一句：唉…係吖…抗爭真係會窮架…聽到佢地咁講，心都酸埋…

又有一個話畀錢，係佢地嘅心意，我都係叫佢地袋返，佢唔肯，又畀我鬧：咁有錢，捐畀星火同盟/612人道救援基金，佢地比我更需要錢，拉左成千人，班年輕人要錢打官司同治療。

又有一次，載住兩個frist aid，佢地落車嘅時候向我90度鞠躬多謝我，我眼淚忍唔住，心諗，要鞠躬嘅唔係你地，係我，係腐敗嘅政府，係林鄭月娥，逼你地走上街頭，你地好勇敢，係我要多謝你地…

出得去多，我幾歳大嘅小朋友都知道我去義載，每一次見我夜晚一個人話出去，都會話：爸爸，小心D呀…其中一次對話係咁嘅…

小朋友：爸爸，小心D呀。

我問：你又知我去邊？

小朋友：係呀，你去載D哥哥姐姐返屋企呀嘛…

我問：咁你都知？

小朋友：係吖，有次未瞓，聽到你同媽媽講話要去救人呀嘛，救得一個得一個嘛…

我話：係呀，你乖啦，早D瞓，聽媽咪話…

小朋友話：你記得小心D呀，小心D警察呀，佢地打人架…

我回佢：知道，我會小心架啦，早D瞓啦…

我轉身就出門口，眼淚都忍唔住直流，我個小朋友一句「小心D警察」係何等悲哀同荒謬嘅事…

亦都想講，香港人真係好團結，其實已經好多次係義載車多過年輕人，D人一知道邊度要車，我幾分鐘後駛到去，就已經泊咗十幾架車係度，心諗，你班人癲架，使唔使咁多車呀，最後，我相信好多人同我一樣，懷住感恩嘅心食白果返屋企…

其實抗爭運動早期，義載車唔係好多，到而家越來越多，民意真係好清晰表達畀政權知，政府已經越來越少人支持，市民都以不同方法去支援呢班年輕人，民憤民怨如此熾熱，政府將來根本無法施政，林鄭，你走吧啦…

最後，如果想保護呢班年輕人，唔好問點様做，每個人都唔同，可以做嘅都唔同，但基本係諗自己同眾多和理非每人行多一步，運動就多一份力，上唔到前線，咪出來和理非遊行，罷工，㩒錢擺屋企，唔去港鐵商場同藍絲商戶光顧，捐錢支持星火同明同612基金畀佢地打官司，警察搜捕落街吊走警察，同身邊人解說年輕人抗爭嘅原因，做下文宣，宣揚下政府同警察嘅暴行…你諗到乜就做乜…如果和理非運動夠團結，成功逼政府讓步，年輕人就少咗走上街頭嘅風險…

尋晚，北大嶼山公路呢張圖片真係好靚，香港人團結一致對抗暴政！

五大訴求，缺一不可！

香港人加油，萬事小心！

⌘ 從我的 iPhone 傳送 ⌘