9月1,同4位阿姐姐一齊被困的4個小時

OT 9月1,同4位阿姐姐一齊被困的4個小時

(原本無心打兩句, 但原來咁多人想知, 我又攰到PK, 打到亂七八糟. 所以執一執開個新POST, 有性趣可以由頭睇過)

特別鳴謝原POST被騎劫樓主 CHRISTY NGAI 幫手騎POST

1/9 當東涌完全塞死時，

4個清潔姐姐在東涌popo屋外拉我門，

但我本身其實鎖左門+暫停載客，

準備隨時接仔女放學。

我開窗同佢地講我唔做生意，

佢地求我做下好心幫下佢地，

因為佢地第一日入東涌開工，

點知收工時乜鳩車都無晒，又戰亂。

見佢地真係好無助，佢地話遠啲都無問題，

就比佢地上車，打算車佢地去老鼠/欣澳轉咩車都好，起碼無戰火。

點知上車後行左一個鐘頭都只係剛剛落到高速，

而談話間我得知佢地係做清潔嘅。

小插曲開始。

其中一個阿姐屋企人 voice msg: 

"唔好同黑衫人一齊行呀，睇住佢地打埋你呀"

我即時答咀: "我黑衫喎，你要唔要落車先？

佢即刻答話: "唔使！你咁好心肯救我地走，你係好人。"

另一個話: "頭先真係嚇死我呀，四圍都係黑衫人，仲攞住棍，幾驚佢地打我！"

我話: "點解你覺得佢地會打你？我話嘅，如果你過唔到馬路，佢地會拖你過，如果你唔識路，佢地會帶埋你行，如果你比人打，佢地會保護你，我話嘅"

4個傻笑唔識答。

當時塞到東涌東迴旋處

有班仔女在左邊步行緊落高速公路離開東涌。

我指一指佢地，問4位姐姐:

"你地好驚果班人呀，你睇下佢地咩年紀，你地諗下點解佢地暑假唔去沙灘玩，要四圍去比人拉比人打？"

"嘿，我地唔知咁多架"

我 "你地唔知唔緊要，我講你地知。首先一聽你地口音就知你地大陸落黎架啦？"

"係呀！廿幾年喇"

(註: 其實唔係4個都係清潔姐姐，3個係，1個係只係咁啱同行。為方便先講4個都係。而佢地共通點係，個個都廣東話唔正)

我 "廿幾年咁耐你都唔識珍惜香港？你記唔記得當初點解要落黎？"

"香港好丫嘛，大陸果時好差。"

我 "你都仲知香港同大陸唔同？咁點解你唔幫手守護香港？"

"我地唔理咁多架"

我 "到今時今日，你認為你可以唔理咩？你放工都受影響喇喎。或者咁問，你知唔知點解要示威？"

"真係唔知喎"

我 "就係由一條法例開始，呢條法例會直接令香港變成大陸無分別。如果呢條條例通過左，香港無一個人係安全。" 

我再指一指出面班仔女，

"你以為佢地爭取緊係為自己？其實係為埋你地啲後代。

好簡單一個例子，

如果條例通過左，

你地個孫得罪左某個大陸有背景同學，可能佢過兩日就會比人合法捉上大陸，仲可能捉埋佢父母。點解會咁？因為條例講明只要大陸有一張官方文件話你犯左大陸法，就有權捉你上去。而香港政府同法官都無權介入。"

"乜咁架咩？"

我 "就係咁樣，即係香港立即變成大陸，香港最寶貴就係法治，亦係同大陸最唔同嘅地方，大陸係人治。法治即係所有野要跟法律，有錢人打完人一樣有罪。人治就係講惡講勢力，你比有錢有勢嘅人打完，佢再話你有罪，你就係有罪。呢個就係法治同人治嘅分別。

大陸係咪咁丫？你地點解要走黎香港？"

"大陸以前係咁架！"

我 "唔係以前，而家都係。"

"而家大陸發達好多啦，好左好多啦！"

我 "邊度好過？你地唔知大陸每一個城市都蝕緊錢？用百億千億計喎。如果大陸咁好點解你地唔上番去生活？"

"唔得啦！田地屋都無晒啦"

我 "你當年落香港生根，你香港又有田地屋？你又生到根？"

我繼續 "你地當年乜都有，但都要走，其實你地避緊乜野你地當時好清楚。今日香港就係反抗緊，就係唔想變成咁樣。當年你仲有香港可以避，你啲子孫而家可以避去邊？"

(唔怪得之前九唔答八,原來打少左下面一段,太攰請原諒)

我再繼續 "班黑衫人其實就係保護緊我地,而我飯都未食,就開架車出黎,就係想盡一分力去保護番佢地."

然後靜左幾秒，突然有一個姐姐錯重點，

"我地都未食飯呀！一放工就亂晒！"

我 "我食上一餐係尋晚凌晨3點..(當時差不多7pm)，本來我打算番黎食完飯先攞車，但一到東涌, 就有外面手足叫我快手，東涌開始危險，所以我飯都唔食就開工，但都已經塞死。

我話唔做生意，就係打算救佢地走，幫得一個得一個。但你知唔知點解我又肯救左你地先？"

"你好心地嘛！

我指指左邊 "唔係我好心地，係佢地好心地"

(已剛塞落高速，左邊有仔女行，行行下開始跑，因為有巴士肯開門比仔女上車，同時好多私家車都開窗幫手叫後面快啲上車)

我繼續 "如果頭先你地同佢地一齊拉我門，佢地都會讓比你地上，因為佢地都知你地無能力行4-5個鐘出欣澳，雖然佢地自己都未必有能力，明白未？所以其實係無黑衫人會揾棍扑你架"

而我後面個姐姐都自己講 "要行4個鐘咁遠架咩！"

我 "起碼啦,條公路其實好長架. 啲人成話佢地收左錢,我比錢你你行唔行？"

無人答

然後同一個姐姐再錯重點

"哇！陰公！3點到而家無食過野！？我有梳蕉喺度呀！師傅仔食條蕉先啦！"

我 "唔使啦，你地食啦，有排塞架。但都多謝先"

靜左一陣

然後坐車頭果個突然講

(基本上我係估佢講乜 多過聽佢講乜，因為佢已經唔係口音咁簡單，言談之間從後面姐姐得知，前面呢個係福建人)

"你地有幾多錢係度呀？我得百幾蚊喎！"

左後面姐姐(唔係清潔姐姐)答佢 "放心啦我有錢啦。"

福建姐姐 "而家跳到800幾蚊喎！"

我望一望個錶... "80幾蚊咋，放心啦，架車唔郁好抵坐架，貴極有限，係我大鑊架咋"

傾左咁耐佢地開始唔驚青，仲閒話家常，其中包括話啲鄉里成日叫佢地幫手買野番鄉下，但又唔比錢之類。

(小柒曲)

中間多次佢地家人都 voice msg 問佢地去到邊，

佢地都唔知自己喺邊，

每次都問我。

其中一次我都朦朦地口快快答

"過左愉景灣"

然後差不多一個鐘後，

我地先到愉景灣🤣

大概兩個半鐘頭後，

佢地都開始好肚餓

真係摷左梳蕉出黎食

我話唔要，

都夾硬塞左兩隻比我

本來我想提佢地要乾淨啲

因為平時我唔比客在車箱食野

同埋千其唔好掉垃圾出車

而我都未講，就聽到佢地已經問緊邊個有膠袋可以放蕉皮，

所以我無講。做清潔嘅可能比較有公德心。因為實在太多仆街會塞垃圾在門手把位。

PS. 啲蕉好撚香！

食完蕉佢地都開始累，

車頭福建姐姐已經瞓著左，

其他姐姐又自己傾偈。

而我隻右腳已經無晒耐力，

索性棟起佢，用左腳，反正淨係踩 brake就夠.

當時我已經知道欣澳已經係死城，

無mtr無巴士，

掉佢地去果度會嚇死佢地，

所以決定車佢地去荷李活酒店。

塞到去老鼠排坊前面迴旋處見到奇景，

兩線入迴旋處，

竟然係左線轉左，

右線轉右直接 u turn 

雖然塞到hihi ,亂到hihi

但亂中真係有序，

真心佩服。

去到荷李活，跳到344，

之前話佢夠錢果個非清潔姐姐比500，

我話收300算啦，

佢話唔好，

我話 "得啦！你地請左我食兩隻蕉！"

(雖然當時係未食，放了在車頭)

佢地多謝緊我嘅時候

我同個接待哥哥講

"佢地唔係入住架

不過幫幫手照顧佢地啦

佢地被困東涌，

我用左4個鐘頭先車到佢地出黎"

接待哥哥眼都突埋 "4個鐘！？"

我話 "係呀，幫下手，睇下佢地要唔要飲水去廁所，未有的士前比佢地入大堂休息先啦"

如果車上係仔女，唔係呢幾個姐姐，

其實我係唔會收錢。

而佢地其實多次問我可唔可以車到佢地番屋企，

我要再三解釋，

我隻顏色係唔可以載客出去，

佢地最後先明，唔係我唔肯出，

係我唔出得。

即係佢地其實比得起錢，

亦唔係我原意要救嘅人

所以我照收錢，不過收平少少

大家開心 

(而其實300蚊我都未夠車租, 但玩左我4個鐘)

其實4個鐘 有好多事發生，

但無可能盡錄。

所以基本上，完

#香港人加油

⌘ 從我的 iPhone 傳送 ⌘