他們不是暴徒 - 馮睎乾
2019-07-03
名采論壇
我家長輩算開明，不親建制，也反送中，但衝入立法會這麼「暴力」，也的確衝擊了他們的底線。作為深藍絲的我，當然要跟長輩理性分析事件。長輩皺眉說：「做乜要衝？」我說：「百萬人上街，林鄭唔聽；包圍立法會、有人自殺、二百萬人上街，佢先扮聽，西口西面答應你半個訴求，有個咁嘅政府，下一代都好灰，所以先有三個人以死明志。但死咗三個人，高官都淨係識烚熟狗頭慶回歸，有人唔希望抗爭不了了之，就把心一橫將行動升級，咪衝囉。」
長輩：「遊行冇用，衝入立法會又有用咩？咪盞畀人叫暴徒！」我說：「有冇用我唔知，但呢班人唔係暴徒，準確啲講，係一班自殺失敗嘅人。衝入去，可能畀警察打死，或坐十碌八碌，你以為班人唔知咩？唔該睇睇訪問，佢哋一早預咗啦。有個十幾歲嘅學生仲講，與其乜都爭取唔到，寧願畀警察一槍打死，所以行得入去嘅人，一開始係想自殺，係自殺呀！所以你嘅問題其實係問：『遊行冇用，自殺又有用咩？』咁問法，個概念會清晰好多。當年劉邦做咗皇帝，齊王田橫為咗尊嚴，不屑投降，於是自殺，田橫五百個門客知道田橫死咗，又集體自盡。後來韓愈為田橫寫咗篇祭文，讚佢『義高能得士』。為尊嚴自殺嘅人，古往今來都叫『義士』，以前中國讀書人唔會問：『田橫同佢兄弟自殺有用咩？』呢個係蠢問題，你要問嘅應該係：『今時今日香港，係邊個逼到咁多後生仔自殺？』」
長輩：「喂，你又話你藍絲，點解好似唔譴責暴力衝擊嘅？」我說：「好，我依家真誠咁譴責佢哋破壞公物。但如果要譴責，唔好漏咗警察：示威者撞窗撬閘八個鐘，警方明明可以部署，以最低限度武力阻止佢哋衝入立法會，但警察冇咁做。佢哋唔單止唔執法，反而當住公眾面前，玩咩『請君入甕』嘅屎橋去引人犯法，警方呢種行為先真正破壞法治，你譴責咗未？」
最後我補充：「佢哋衝入立法會，理性上我反對，但內心真係冇乜反感，因為立法會唔見晒班過街老鼠議員，視覺上反而乾淨咗。」長輩點頭說：「咁又真喎。」
廣告
沒有留言:
張貼留言