【網友羅湖過關因電話內有遊行相片被扣留四個鐘】
今日係深圳羅湖派出所，拘留咗四個鐘。
事緣係咁嘅…… 我今日過深圳洗牙， 約咗牙醫三點， 但係我一點半已經去到診所， 睇下有冇機會 早少少搞掂，然後返去元朗示威遊行…… 但最後我都係四點先搞點……
洗完牙返香港，過大陸關嘅時候， 我畀人抽查， 要求檢視我手提電話， 我就知道應該有排搞…… 佢哋， 要求我展示相簿，睇到我手機裏面，有遊行示威嘅相片…… 喺海關帶到我去一個短暫嘅羈留室…… 將一部分相片傳去他們的電腦。
問我有冇參與遊行示威，我答有，問我幾時去參與，我就話6月9、6月12、6月16、7月1，其他日子因為我抽唔到時間所以冇去參與。問我係咪有人叫我去參加，我話唔係，我自發性… 問我為乜嘢要去參加遊行示威，我就講返我嘅訴求撤回逃犯修訂條例，同埋成立獨立調查委員會，調查警察濫權，即使政府認為示威者有過分行為，都應該去成立調查委員會去釐清事實。
問我有冇參與暴力活動，我話冇，如果我有嘅話我係唔會過關嚟呢邊。 我只係用我嘅方法，去爭取一個公平民主嘅社會，但係我都有去上前線，叫雙方冷靜一啲，我只希唔希望兩邊打交，因為有人流血受傷係一個遺憾……就算你拘捕我，我唔緊要，我反而可以正正式式咁講點解我要咁樣做，即係好似而家呢個情況。
係海關問完，再帶咗我去羅湖派出所，在正式登記我嘅資料姓名、香港電話、香港地址、屋企人姓名…… 然後我都係講返大致上面嘅嘢…… 佢最後問我個問題，問我點睇呢件事點解會搞成咁？ 我就話我哋嘅訴求，但係政府唔聽我哋，只係敷衍咗， 令到示威嘅人越嚟越激烈希望政府有反應， 先會搞成咁，而家雙方都落唔到台， 但我自己只要我有時間，我就會繼續堅持，做我夠膽做嘅嘢去到一直爭取落去……
其實個過程都好平靜，有陣時佢哋要求用國語，有陣時佢哋又要可以畀我用廣東話， 因為成個過程，同我對過話嘅都有五六個人員，但最後喺羅湖正式同我落口供嘅警務人員係講廣東話同我對答……啲公安亦冇禮貌對我，四個幾鐘頭，我大部分嘅時間都係等…… 無論喺海關、派出所，都有唔同情況嘅個案，佢地要處理， 基本上我只係排隊，但從佢哋對話當中，我知道今日，我之前已經有三個人因為呢個情況嚟咗。
走嘅時候都八點幾，輾轉我都係返咗屋企休息冇去到元朗……
其實我冇乜話驚，因為我知道最多都係咁，呢啲事，實在太細件事，唔會拉我去坐監嘥米飯養我……我真係一個和理非，冇咩值得驚，我最擔心佢沒收我電話。 不過我反而想提醒一下同路人， 如果唔想因為呢啲事情耽誤自己嘅時間行程，出入境時處理一下電話資料，同埋有定心理準備出現呢個情況應該點樣應對…… 好在我今日冇咩太大緊要事。
⌘ 從我的 iPhone 傳送 ⌘
沒有留言:
張貼留言