一個極度催淚的帖文，男人老狗最好儲低返屋企至睇。

OT ：一個極度催淚的帖文，男人老狗最好儲低返屋企至睇。

內文：

琴日71，我本身係屋企睇新聞，因為朝早唔係香港幫唔到手。晚上1030點左右返到香港，我返到屋企睇住新聞訓唔著，好迷茫。我只係一個普通打工仔，係屋企睇電視，諗唔明白班後生點解要咁做。

去到12點左右，我睇住立場新聞見到有班學生走唔到，地鐵又落左閘，立會入邊d學生又走緊，我決定揸車出去救得一個多一個。係網上一講，好快就知道班示威者係邊，第一轉去到金鐘，見到3個黑衫男仔，應該16-18歲左右，我大叫叫佢地上車，佢地開頭好驚以後我屌佢地搞事，想轉身走。個下我見到佢地眼神好驚好無助，我落車拉佢地上黎。我見到呢班學生好慌張，完全唔識反應，我叫佢地掉曬所有物資，換我比佢地d 衫。幸運地個陣未有roablock，好快去到旺角走人。

第二轉，一車5個人有男有女，一準備入紅隧門口有roadblock，坐後排個男學生見到，佢怕連累我想落車自首，我即刻鎖曬乘客既門，大叫 "屌你老母同我坐返底。" 我唔係想嚇親佢地，但係當時大家都好緊張，旺角已經有幾個車手同學生比人拉左。好彩有小小插曲我地唔洗入roadblock，係隧道人員指示下就走左。係去旺角途中，好安靜，無人出聲，無人喊，無人屌警察，大家只係dup底頭禁電話，望住出邊既警車飛過。突然一個學生話:「多謝曬你，我地一陣夾返錢比你。」 上車後佢地講既第2句野，明顯驚魂未定。我話:「唔洗啦，反而我想知你地點解今日咁衝動，你地知唔知好撚大後果?」

學生答:「我地知啊，但係無諗咁多，個政府有錯唔認，我地只係知道岩既就要做，錯既就要認。」學生輕描淡寫咁講，呢一刻我已經認唔撚到，係撚咁喊。眼淚令到前路越黎越唔清楚，就同香港一樣。但我個刻唔係感動，係好撚內疚。點解咁簡單既道理，中學生都明白。點解大人搞出黎既麻煩，要班後生去承受。我個刻覺得好羞家，原來大人受過社會薰陶會變成是非不分。

點解，點解一個城市，要用咁多年輕人既鮮血同青春黎喚醒我地呢班大人既良知。

點解，點解一個政府，做錯野唔肯認錯，唔聽市民既聲音，唔對話，小朋友都明，錯就要認，身為國際大都會，我地連呢點都做唔到。

點解，點解一個社會，咁多年輕人為自由獻身，我地都唔出黎，係咪已經比社會圈養到無左反抗能力，係咪只係識係內鬥捉鬼遊戲中只我安慰。

事情去到呢一刻，已經唔係政治問題，係倫理問題，如果大家仲唔用身體去守護呢班後生，香港就會變成一個是非不分，只有政治正確既地方。各位係office睇緊呢篇文既人，我都係電腦前工作緊，可能我地比社會教化得太利害，咩都逆來順受，就算係老闆錯我地打工仔唯有硬食。"老闆都話左會聆聽員工，不如算啦。" "個社會係咁架啦，唔洗咁著重邊個岩邊個錯。"

我可以話，琴日衝既一定唔係鬼，係一班 仲未被社會污染，仲有道德判斷能力，仲有尊嚴，仲有一腔熱血既辛辛學子!!!! 佢地只係服從緊最基本既道德價值，民主自由人權，黑白分明，所以佢地可以勇敢地為自由獻身，佢地唔係恐怖份子，佢地個個心入邊都驚過你同我! 佢地敢用十年青春甚至生命去維護正義。如果大家再唔支援學生，甚至落井下石，講風涼嶵話，身為香港人真係好可恥。琴日凌晨香港已經開始白色恐怖，無人可以獨善其身，唔好浪費年輕人既生命同熱血，係成年人同年輕勇武派一齊奮鬥既時候啦。

⌘ 從我的 iPhone 傳送 ⌘