【香港人，第一槍已經打響】

【香港人，第一槍已經打響】

尋日警察為咗阻止集會形成，大規模使用暴力，結果有催淚彈打中示威者眼，亦有布袋彈打到記者嘅眼，更加有數之不盡嘅逮捕後施以私刑既畫面喺金鐘出現。喺外地嘅香港人一路睇住直播，睇到個心好亂，嬲到係唔知講乜嘢好。

濫暴？警察由612開始已經係濫暴，為咗掩飾612嘅過失，就係令全港警察一齊暴力升級。為咗幾個前線跳掣嘅警察，全隊警察一齊攬炒。調查？處分？全隊警隊都會中招。警察就係睇死冇人可以脅迫全對警隊，情況更加係變本加厲，為所欲為。於是示威者既武力亦相應升級，越嚟越唔同警察客氣。形成惡性循環。

大概個幾月之前，大家都已經開始怕：再咁落去遲早搞出人命。不過警察真係以為自己係天上人：懲罰蟻民天公地道，但如果令警察受傷，就係罪不可恕，必須加倍奉還。佢哋似乎真係冇諗過，如果打死示威者個後果會係點。於是繼續棍棍打頭，捉住喺地下就老奉用膝頭跪頸，失曬理智。

今日示威者帶住之前一日滿腔怒忿，破天荒喺全香港不同地方，打開五六個戰場。果然，警察既兵力由於分散各區，變得相對薄弱，而且經常被落單，身處面臨被圍毆嘅位置。為求自保，就用武器為自己打開一條生路。 油麻地衝鋒車上面嘅警察， 落車拉人反被圍毆，要向天開槍示警。呢件事已經值得令人警戒。果然相隔不久，就出現荃灣警察拔槍向威者胸膛開鎗呢種冷血而荒謬絕倫嘅行為。

可能有人話，警察都係為咗自保。 但係游城大編委拍到嘅一段片段所見，開槍嘅警員一開始已經唔係拎警棍，而係拎住槍衝埋去。唔好講乜嘢電光火石之間，佢一開始嘅動機就已經係埋去開槍。有幾荒謬？ 嗰度係荃灣二坡坊，黑社會斬人手腳，斬斷手筋腳筋，斬到見骨嘅地方。黑社會斬人從未破案，重要搭膊頭有計傾。示威者拎住把遮衝過嚟，就近距離向住心口開槍攞佢命。就係咁荒謬。

有種嘅，721開槍打一個黑社會睇下？ 1993年既警察，對著葉繼歡呢啲悍匪開槍。2019年既警察，用納稅人嘅錢買嘅槍同子彈，唔係對付黑社會保護市民，而係向我哋嘅仔女兜心口開槍。我再講一次：出我哋納稅人嘅糧，包庇黑社會，再開我哋嘅槍，打我哋嘅仔女。

香港人，警察既第一槍已經打響。由胡椒噴霧到警棍，到催淚彈以至布袋彈，警察過往嘅紀錄係用過一次，就會毫無節制亂咁用。開得第一槍，佢哋之後每次都會開槍。而且亦都唔在乎究竟係打傷定打死。以後上街抗爭都會成為警察嘅活靶。

香港人，除咗五大訴求，而家已經係全面同警察嘅戰爭。我哋嘅前線每一個都預咗冇命，我除咗尊敬同自慚形穢之外我冇嘢講。但係我哋每一個人都有責任同佢哋一齊打仗。由即日開始，必須要全面抵制所有警察同埋佢哋嘅親屬。任何人只要認得邊一個人係警察，一定要畀身邊嘅人知。包括佢哋嘅父母妻兒，全部都唔好再同佢哋有任何交集，唔好再做佢哋生意，唔好再同佢哋有任何接觸。佢哋可以留喺自己嘅藍絲社群，或者返上大灣區。但係 喺香港就要佢哋冇朋友，冇定企。撐警嘅企業嘅都要全面抵制。無論點樣都唔幫襯，一定要有咁嘅決心。

呢個只係開始。我心裏面當然有其他諗法，但係無謂煽動大家。總之，任何事情由我哋每一個人自己開始做起。 諗起心口中彈呢位前線，我哋一般人做得嘅任何嘢，都唔會算得過份。

全面戰爭，已經開始。五大訴求，缺一不可。抵制警隊，零度容忍。

We don't forget, we don't forgive.

#香港警察殺人犯 #香港警察強姦犯 #香港警察偷竊犯 #真槍實彈打市民

#五大訴求 #缺一不可 #反送中 #光復香港時代革命

#HongKong #antiELAB #HKprotests #TerrorAttacksbyHKPolice #freeHongKong #ChiNazi

⌘ 從我的 iPhone 傳送 ⌘