《移民的人在想什麼：如果命運能選擇》

《移民的人在想什麼：如果命運能選擇》

又係忙碌既一日，更加係一個無眠既晚上。大家如果有睇開我地寫既文，都知版主係一個兩登佬（高登，連登）。所以有大量兩登既用語，希望大家唔好見怪。（睇唔明既會一頭霧水）

🔥又話就算BNO有得走都唔應該走

今日最震撼既當然係英國黎緊會修訂直接俾BNO持有人及家屬有5年既居留權呢一件事。然後例牌上一上連登，好得意。BNO未修訂前，個個都話英國應該要俾BNO平權。其實我係反對平權既，因為平權即係愛支國（熱愛支持某國）人士一樣可以去英國，變相即係益左佢地。反而好似而家咁講明會做immigration check，大家都明既，某啲人應該唔洗諗了。講遠左，之前未改BNO就話要改BNO，改完之後，又話就算有得走都唔應該走。

🔥 低成本走仲想點

我睇到呢度覺得有啲精神分裂：吓？咁難得先有得咁低成本走，唔洗好似我地一家咁，先用50萬歐再加埋其他雜費搞你成500幾萬HKD，仲想點？

🔥 有冇諗過為佢地做更多

好多人話：走左就即係放棄左冇BNO果班小朋友。掉返轉，你地今日咁留晒響度，冇反抗能力又唔係企前線（我指和理非）睇住班小朋友俾人夾走俾人打俾人酷刑，又唔係放棄佢地？你地有冇諗過為佢地做更多既嘢？響外國多一個人記低佢地既事，等佢地唔好被永遠消失，比起你「留」響度，唔係黎得更有意義？

🔥 由上至下咁清洗

我係一個喜歡計劃既人，我睇到既嘢係，香港已經失去左一啲嘢，響某個情況來臨之前，香港只會被人由上至下咁清洗。做開管理層既應該知，呢幾年有幾多職位係由某國既人空降落黎，有幾多職位係俾真香港人升上去。而小朋友既教學書本，差在未出返幾十年前既「不愛爸不愛媽，只愛？？」。

好多人話乜嘢過多幾年先俾小朋友去外國讀書，但如果你既小朋友到左中學甚至大學先出國，佢地既價值觀、文化，已經唔會同外國夾得到。大家睇澳洲小粉紅留學生就知。

🔥 唔通起埋屋送埋錢貼埋大床俾你黎嗎

而家難得英國開一條路俾你地，我見仲有好多人響連登問埋啲好低質素既問題，如：去到有乜嘢做呀？響英國咪又係做二等公民？響英國咪又係俾人歧視？響英國乜都好貴呀⋯⋯下略三千字。

唔知點解，我一見呢類問題就會火滾。人地俾條路你行，俾你移民俾你居留工作，你唔識自己諗下？你唔識自己摸索？洗唔洗人地起埋屋送埋錢貼埋大床俾你黎？自己既人生自己負責，點解連工作都要問人？你啱啱畢業時又去問人自己做乜好？呢啲連基本自理能力都欠奉既人，點解要移民？

🔥 其實你首先唔係要考慮移民後要做乜

我一路都話：移民唔係終極解決問題既方法，只係幫你搵適合自己既解決方法提供唔同既方向及buffer。如果連做乜都要問人既話，其實你首先唔係要考慮移民後要做乜，係要考慮自己應唔應該移民。

🔥 諗起6年前既自己

我好鍾意同問我地既版友傾電話（過左test果啲），同埋我好鍾意反問返佢地，點解唔考慮XX，XX，或左XX國家呀？因為好老實，其實我地唔係移民中介，但我好想襯呢個機會，幫大家疏理一下自己既思維，有人好快答到我，例如唔想二次回歸OU其他答案。聽到呢啲我最開心，因為咁代表其實你好清楚你自己想要乜嘢。望住你地我就諗起6年前既自己，我都想幫你地知自己想要乜嘢。

🔥珍惜逃生門

我成日都叫大家去邊都好，最重要係知自己想要乜嘢，同埋真係有所行動。通常呢類人，都唔會生存唔到。而通常呢類人，都係真。香港人。

最後唔知大家有冇留意，國際間既行動，突然變很急速好多，要知道如果西方真係制裁，其實平民一定會受到影響，而家開晒逃生門俾大家，就係想俾個位大家走位。希望大家珍惜機會，同埋離開後先做好自己，再準備幫助更多真。香港人。

好長氣，但共勉之

⌘ 從我的 iPhone 傳送 ⌘