【差佬晒馬】頭盔高志森借「強姦論」表態出完即刪po

2017-02-23 17:20:46 HKT

網民睇完高志森個故仔，都大惑不解，試圖拆解箇中比喻，最後無功而還。

今日同大家上一堂，學習比喻。
先嚟一個反面教材，學習如何比喻不倫。

「我想拍的電影故事：一個女人被強姦，佢不甘受辱，追返入後巷踢咗強姦犯春袋一腳。二人被捕送官究治…
「結果係強姦犯被判坐牢5個月，準(准)保釋上訴，女人踢人春袋罪大惡極，判兩年，即時入獄。
「即使被強姦，也不得有情緒報復下私刑喎。強姦犯仲話，要個女仔同佢道歉喎。
「更重要係，所有人不得議論我的劇情，因為我係導演！嘿嘿！」

高志森呢個比喻講緊咩？
以高大導演嘅頭盔mode，佢肯肯定好似上次咁講：「黃屍想用我以上呢段文字砌我，可笑！我以上有邊粒字係談論今天判的案件？有邊粒字係『藐視法庭』？？」

所以，頭盔先生今次都係會話：「黃屍想用我以上呢段文字砌我，可笑！我以上有邊粒字係談論7警？有邊粒字係『藐視法庭』？？」對呀，凡親同高志森持不同意見，高志森就話你「黃屍」。呢方面，高志森係唔戴頭盔嘅。

就咁嘅，第一，講番高志森拍戲。依家佢拍戲有冇人睇呢？根據hkfilmart 2015年4月一篇文章，指高志森執導嘅《媽咪俠》，之前喺大陸戮力各地宣傳。但票房收入竟然只收14萬人民幣。(文章連結: http://bit.ly/2kP30CI )

然後再研究下高志森喺呢個時候出呢個fb post，想講啲咩？

既然講得係拍戲，網民就自行購票入座：
「我家陣極不安，高生居然鼓吹強姦，因為只坐五個月。（但點解我讀Law，衰強姦明明寫住最高刑罰係Life Imprisonment？）」
「言下之意當日有人一個人強姦咗七個警察，之後七個警察一人踢咗他一下春袋。」
「強姦判刑得5個月，仲可以保釋咁奇？另外，個強姦犯犯完案，不單俾個受害者走，自己仲留在案發現場？唔通等人拉？而且見個受害人自己一個返嚟，居然可以俾人踼春袋？唔避唔擋唔閃唔還手？仲會有得報警拉晒返差館？成個故事好似好多地方唔合邏輯。係高生唔識作故事，定佢想表達啲咩？」
「強姦=淋水。踢人春袋=鎖手枱去暗角打足7分鐘。女人=有槍有警棍嘅警察。強姦犯=揸住水樽，仲要係膠嘅。依家先知常識同大道理，真係唔係人人都有。」

嗱，呢啲全部都係網民自行對號入座㗎咋。
其實都想搵番啲撐高志森嘅網民留言，平衡番啲言論。
但係好可惜，高志森唔知點解，刪咗個po了。

⌘ 從我的 iPhone 傳送 ⌘

老花筆記本

2017年2月23日星期四