識揀女朋友，一定係揀個肯陪你行山既女人

之前有篇文章《一生只係想搵個陪你挨M記既女人》大熱，果排眾港女馬上貼圖洗版表示自己肯挨M記，係好女人娶得過。我睇完之後笑而不語，我認為真正娶得過既女人係一個肯同你一齊行山既女人。因為每一次行山都係一場試煉，由前期計劃，到真正去行所需要既智力，體力同耐力缺一不可；

鍾意行山既女人，多數都好細心；計劃行山可以考驗細心程度，解難能力，呢啲條件難能可貴；套用落佢人生，佢一定係個井井有條既女人，第時可以將頭家打理得整整齊齊，屋企既野唔洗你憂心。

鍾意行山既女人，多數都係祟尚自然；佢地注重環保會為地球出一分力；平時生活樸素，實而不華，唔會嘥好多錢買衫同物質；即係慳家！望到個靚景／滿天星星已經可以開心成日，唔洗苦廢咁多心思去討好佢，因為同你一齊行山佢已經覺得最開心！佢平日不施脂粉，果種發自內心，真摰既笑容更加係冇景色可以媲美；又可以慳一筆，儲低既錢又可以做其他事！

鍾意行山既女人，多數都係好有愛心既；雀鳥爬蟲小動物都係行山既攝影／觀賞既好題材，一睇／影就可以玩足一日，而且可能每次都有新發現！佢地鍾意小動物，果種泛濫既母愛，將來一定係個好母親，你放心將小朋友交俾佢湊啦！

鍾意行山既女人，體力好，身體好，即係挨得苦。挨得苦既佢可以陪你一齊攀山攝水，比起淨係識得行街睇戲「HIGH TEA」既港女，真係冇得輸！仲可以計劃同佢一齊長征、露營、流浪、環遊世界，係一個好伴侶even你既人生伴侶；佢地對自己身體健康有要求，絕對唔會俾自己病或者食埋啲垃圾食物(例如港女最愛部隊鍋、馬卡龍)，你唔洗擔心佢健康之餘分分鐘佢照顧埋你一份！

拖住手行住山一路影靚相，我扶下你你扶下我，「相擁俯看世上風霜」，每次都係一個深刻回憶；真係淨係諗下都扯扯地，即刻約囡囡行山先！

同樣理論亦適合用於揀男朋友
講到尾，
首先......你要有一個女朋友。