香港的移民潮
最近香港陸續出現移民潮，所以想講吓自己對移民嘅睇法。
首先強調返，本身曾經被捕面臨刑責風險或者認為自己有好高機率被捕，被迫離開香港嘅流亡人士不再討論範圍內。
大家都知道自從2019年之後，好多國家都放寬移民政策，甚至推出左專門為香港人而設嘅移民政策。
我睇法係即使外國唔推出新政策，仍然有能力符合移民條件嘅人，佢哋離開香港係佢哋個人嘅權利自由，冇得怪責，因為佢哋係憑自己或者家人嘅能力達成條件。佢哋移民後不參與香港嘅事務亦冇得批評。但係社會上肯定亦有一批人係靠外國放寬先符合條件，呢班人就唔同講法。外國願意放寬，絕對同2019年香港人嘅行動有好大關係，所以我會視呢啲移民政策，係一種人血饅頭，因為係靠好多人嘅血汗換取返嚟，藉住放寬後先有能力移民嘅人，佢哋嘅移民我認為係食緊人血饅頭。不過唔好誤會，我反對任何人食人血饅頭，相反我好支持食，因為饅頭已經有示威者給外國政府製造出來，唔食嘅話，係一種浪費。我認為應該好好品嚐，到食完之後，以自己嘅方式為香港前途出一分力，咁先對得住所有為咗香港而面臨牢獄之災，曾經為香港流血甚至失去性命嘅人。
我當然知有好多人身處外國都默默為香港付出，但由於不宜公開，可能受到指責時會感到冤枉，有啲難言，對此我只能向嗰啲人致敬意，同埋期望佢哋可以撐得住。同時我亦希望指責別人移民嘅人，指責時盡可能分清楚邊啲先係理應受到指責嘅人，另外亦希望指責者手下留情，以免在不知情下怪錯好人傷害到無辜人士。
相信一定有人認為喜歡香港的話就寧願留在香港，為改變香港而奮鬥，我好尊重同喜歡呢種睇法，以及抱住呢種睇法並且加以實踐嘅人，但我嘅睇法係用咩方法可以達成大家嘅共同目標，成功改變香港，世上冇人可以提供正確答案，離開香港去外國奮鬥到係其中一種方式，我唔會否定呢條路。
所以，喺移民與否話題上，我一樣採取冇大台原則，每個人自行決定，最理想情況係每個人都惜才適用，視乎自己嘅技能，專長選取合適崗位及地點，發揮最大後果一齊合力爭取理想中嘅香港。
⌘ 從我的 iPhone 傳送 ⌘
沒有留言:
張貼留言