《鄭州水災是否避無可避?》( 科普長文慎入)
呢個題目，話分兩頭。水浸，係無可避免; 人命損失，係人為問題。
事發之後官媒包括《香港01 》都不斷強調鄭州三日落咗一年分量嘅雨[1]。千年一遇，超千年一遇，五千年一遇，總之天災避無可避。好多更加用香港嘅黑雨嚟比，話鄭州落雨勁過香港黑雨(每小時70毫米)三倍咁咁。
咁實際講，今次鄭州喺三個小時之內落咗300毫米雨，其中一個鐘頭落咗200 毫米，的確係相當誇張。香港曾經有個嘅最高雨量，係2008年既145 毫米[2]，即係鄭州今次落雨真係勁過香港嘅。
但係咁又點?事情唔能夠睇一啲唔睇一啲。根據官方資料，鄭州嘅排水設計就算市區都只係去到50年return period[3]，佢哋每年嘅年均降雨量都係六百幾毫米[4]。相對嚟講，香港嘅市區主要排洪，設計係去到200年 return period[5]，而香港年均降雨量更高達 2300 毫米，接近鄭州嘅四倍。換句話講，佢哋抗洪嘅設計基礎要求，同香港係差好幾倍。
咁樣唔係話鄭州嘅設計概念有問題。人哋冇咁嘅需要，就係唔需要設計咁勁嘅系統。呢個係好正常。只不過，好似《香港01》 咁純粹去相比嗰幾個鐘頭嘅降雨量就一概而論，係一種不盡不實而且毫無意義嘅比較。
香港60年代水荒嗰一年，降雨量就係九百幾毫米，都仍然比鄭州全年降雨要多。咁佢哋嘅系統根本冇辦法負荷暴雨就係可想而知。
所以，更加大嘅問題就喺度: 明知場雨大到離曬譜，點解一早冇任何防汛應急嘅措施?? 鄭州20號凌晨開始已經係大雨，據講氣象部門亦連發預警，咁20號繼續返工返學，民眾亦都冇預先避難，地鐵繼續運作，咁就係問題。
可以避免嘅人命傷亡冇避免到，之後救災有啲乜嘢咁神奇偉大都係多撚餘。如果睇返大陸嘅官方文件，鄭州嘅防澇應急計劃2019年先至檢討過[3]， 文件覆蓋範圍非常全面㗎，但係點解冇執行???
中國嘅問題，我就冇興趣再研究，事關從來都係講就天下無敵，做就無能為力。咁其他地方國家又如何?
遠嘅地方唔講，先講香港。香港過去20年，進行過幾個相當大規模嘅渠務工程，全部都係因應曾經發生嘅大水浸而做嘅改善措施[6]。包括上環經常發生嘅水浸同海水倒灌，跑馬地低地水浸，同元朗西北河川經常氾濫。渠務署過去喺中西區進行半山截流，喺跑馬地同西環興建大型儲洪池，係新界西北進行大規模河道工程，呢啲都令到我哋以前喺新聞經常聽到嘅水浸近年已經冇再發生。
呢啲工程造價昂貴，而且往往涉及深層或掘又要顧及對居民影響，係相當吃力不討好。但係即使昂貴，跑馬地蓄洪池都只係十億港幣，荔枝角雨水排放水道都只係17億。相比之下，高鐵同三跑動不動千億成本，係幾咁無成本效益。
另一個知名工程就係日本東京嘅首都圏外郭放水道[7]。東京地形本身就係一個盆地，以前經常水浸，呢個工程建造咗五個巨型豎井( 最大嘅有 70米深30米直徑，成隻穿梭機放落去都仲有位) 加上甚至可以稱為地下宮殿嘅巨型儲洪池，再配合極之誇張嘅泵水系統( 每秒200立方米)，整個系統令到東京水浸嘅情況大幅減少。而咁誇張嘅系統，都係港幣二百億。
所以最後一個問題就係: 鄭州話說用咗500億去將城市打造成"海綿城市"，能夠吸水排水乜乜乜…
好似香港呢啲窮鄉僻壤用十億八億都搞得掂，日本呢啲經濟泡沫爆破一沉不起嘅國家都係200億，咁500億應該可以識飛，但係點解會水浸到好似 玩急流咁呢?
呢啲可能就係香港人點都唔明嘅中國特色共產主義優越性掛?🤡🤡🤡🤡🤡🙊🙊🙊🙊🙊
[1]https://www.hk01.com/研數所/653301/河南鄭州水災-超千年一遇暴雨有幾勁-雨量竟多過香港黑雨咁多倍
[2]https://zh.wikipedia.org/wiki/香港氣候
[3]http://public.zhengzhou.gov.cn/02MA/296863.jhtml
郑州市城市防汛应急预案
//随着郑州市城区及周边河道治理的加快，结合城区排涝体系的完善，到目前为止，城区及周边河道防洪标准部分达到了50年一遇、城区部分河道排涝标准未达到5年一遇的标准//
[4]https://zh.weatherspark.com/y/127378/中国、郑州的全年平均天气
[5]P.137, STORMWATER DRAINAGE MANUAL, DSD, 5th Edition, January 2018.
[6]渠務設施網上遊
https://www.dsd.gov.hk/TC/Education/DSD_Facilities_Virtual_Tour/index.html
[7]江戸川河川事務所ホーム, 首都圏外郭放水路
https://www.ktr.mlit.go.jp/edogawa/edogawa_index048.html
[8]郑州：打造"会呼吸"的海绵城市
https://weibo.com/ttarticle/p/show?id=2309404642458893156810
⌘ 從我的 iPhone 傳送 ⌘
沒有留言:
張貼留言