睇公務員集會 Live 平叔段 Speech，型到爆裂，數唔到俾歡呼同掌聲打斷咗幾多次。所以，我決定將最精彩嗰兩段筆錄，認真數一次。
xxxxxxxxxxxxxxxxxxxxxxxxxxxxxxxxx
前公務員事務局局长王永平：
我頭先聽到人講，政治中立。我可以話俾你知，我已經再冇權勢去詮釋乜嘢叫做「政治中立」。但「政治中立」係我寫嘅，十年前係我寫嘅。（歡呼 x 10）
所以我有資格去講！你地今次嚟，係完全冇違反「政治中立」。（歡呼 x 100）
香港，我地最珍惜嘅自由，係包括免於恐懼嘅自由，你地唔需要恐懼。（掌聲）
你地係完全合法合情合理，以個人身份表達你地嘅訴求。好多人話「政治中立」就等於向行政長官、政府忠誠，其實個意思絕對不存在向個人忠誠。（歡呼 x 50）
我地係向我地個體制忠誠，向我地個制度忠誠，向維護我地核心價值嘅整個社會忠誠，向我地嘅市民忠誠。（歡呼 x 10）
⋯⋯今日好多記者問我，話點樣睇公務員事務局呢封信，我話唔需要緊張，絕對唔需要緊張，咪當佢一個溫馨提示囉，冇問題。（掌聲）
因為你地今日嚟係冇問題嘅。（歡呼 x 10）
你地將來選擇你嗰個政治訴求都係冇問題嘅，因為香港嘅核心價值，係乜嘢？係法治，係自由。公務員守則唔係淨係講政治中立。公務員守則第一條，又係我寫嘅，（歡呼 x 10）
係堅守法治！（歡呼 x 100）
法治，係高過所有政府嘅官員，（歡呼 x 50）
高過特首，（歡呼 x 100）
無人可以挑戰呢個法治。所以如果我地覺得，我地今日呢個政府、今日嘅特首、今日嘅領導班子，佢做嘅嘢，係違反或者唔符合法治，作為公務員，作為市民，我地係有責任去指出嚟。係咪！？（全場高呼「係」）
⌘ 從我的 iPhone 傳送 ⌘
沒有留言:
張貼留言