LamLam脷推介-上環10間必食小店

喺港島區，講起話要去開飯，大家通常都會諗中環、銅鑼灣同西環，其實上環都係個搵食好地方。上環集民居同商業寫字樓於一身，一到 Lunch Hour，間間食肆都打曬蛇餅。不過正正因為咁，先證明有好嘢食！今次小編慷慨解囊，向大家推介10間上環必到食店！你又點可以錯過呢？

1. 限量無味精蒸飯靚湯　一星期唔撞款
美食吸引力大，不過，有時都懷念住家飯嘅味道。無住家飯盒帶，可以去上環呢間主打少鹽少糖少油無味精蒸飯同老火靚湯嘅長龍飯店！不論係飯抑或湯，都係限量。蒸飯餸包括排骨、肉餅、蒸雞、蒸魚、雞翼等等，每日9款，每款約20份。雖然係家常小菜，但就吸引好多人去食。如果想食到鍾意嘅餸，就一定要早啲打電話去留飯喇！

長龍食店

^{圖片來源：mavis_foodie @IG}

長龍食府
地址：上環畢街11號地下
FB：www.facebook.com/changlongshifu

2. 今次大煲了！瓦煲公司麵
去茶餐廳食嘢，常餐以外，餐蛋麵大家應該食唔少喇！呢間冰室竟然放棄大家見慣食慣嘅餐蛋麵，轉而推出成個瓦煲咁大個嘅鍋仔公司麵！唔單止個煲大咗，裡面都多咗好多配料，有叉燒、雞蛋、午餐肉、五香肉丁、腸仔同鮮牛肉……嘩！咁多料，真係想唔肥都幾難，今次真係「大煲」喇！

^{圖片來源：hungrysu @IG；ric_yim @IG}

除此之外，嗰度仲有其他名物，包括香蔥碎牛炒蛋厚多士、粒粒西多士、奶茶紅豆冰同蔥油叉燒撈麵，真係睇相都流口水！

海安咖啡室
地址：上環干諾道西17號

3. 少年食神力推冰室美食
究竟係咩嘢食咁厲害，連少年食神 Michael Lam 都成日去食，仲 Post 上 Instagram 呢？原來係豬扒炒蛋治同西多士！豬扒薄切，即叫即煎，多士烘至金黃，蛋炒得嫩滑，有咩可能唔好味？小編親自嚐味，食過呢度出品嘅西多士，大家睇下張相，就知有幾掂啦！

^{圖片來源：Michael Lam @IG；搵食有僑 Facebook}

興記咖啡室
地址：上環蘇豪荷李活道182號地下

4. 勁吸睛「三眼仔」飯
咩叫「三眼仔」飯？其實即係叉燒煎蛋飯，不過老闆夠慷慨，煎夠3隻蛋！每隻都係太陽蛋，舖喺飯上面，就好似有3隻眼望住咁，所以食客就幫呢個飯改名叫「三眼仔飯」！識食就梗係將啲豉油、蛋汁撈埋叉燒飯一齊食啦！都係唔夠飽，可以加埋腸仔同餐肉架！

^{圖片來源：colemanng @IG；randolphwong @IG}

一次過3隻蛋，對小編嚟講已經爆曬燈，但網上竟然有一位食客咁樣挑戰，點可以畀個「服」佢呢！

孖沙茶餐廳
地址：上環禧利街23號地下

5. 無人能抗拒嘅豬扒
好多人都驚肥，唔食豬扒；有啲人亦會因為語帶雙關，而唔敢承認自己鍾意食豬扒。不過，呢度嘅豬扒相信無人會抗拒。豬扒每日由人手拍鬆，之後醃一晚，第2日即叫即煎。上檯傳嚟陣陣焦香，咬落肉質嫩滑，中間亦充滿肉汁，佐飯的確一流！

科記咖啡餐室

^{圖片來源：stickywu @IG；remonleung @IG}

原來呢度仲有另一樣必試美食，就係叫價四十五大元嘅洋蔥沙嗲鮮牛多士！多士烘好後，夾入勁多鮮牛肉片，沙嗲汁份量恰好，超惹味；洋蔥香甜，絕對令多士更添滋味！大家記得叫「留邊」喇！

科記咖啡餐室
地址：上環蘇豪荷李活道200號J-K舖

6. 熟食中心必到之處
講起上環熟食中心，好多人一定諗起瑞記咖啡，因為嗰度嘅奶茶同西多士都好特別！奶茶沖好之後倒入玻璃汽水樽裡面，再放入雪櫃冷藏，製成凍奶茶！而西多士係香煎版，無咁油膩之餘，再淋上煉奶，口水都要流乾了！

瑞記咖啡
上環皇后大道中345號上環市政大廈2樓熟食中心17號舖

7. 車仔麵店野生捕獲發哥
根據一個網上民意調查結果顯示，香港人對發哥十分擁戴，係理想嘅特首人選。發哥咁得民心，同佢合照打卡一定勁呃Like！呢間上環嘅車仔麵店你就一定要去！味道好就肯定架喇，不過連發哥都去，又大讃好味嘅話，小編決定一陣又去食！

^{圖片來源：Angela Yu Facebook @麵尊}

麵尊
地址：上環蘇杭街22-24號1號舖

推薦閱讀：香港十大最好味車仔麵推介

8. 上環日本嘢新力軍
喺上環，好少有又抵又好食嘅日本嘢。如果你係拉麵迷，可以去試下呢間新開嘅拉麵店，因為評價唔錯，有好多人食過翻尋味呢。唔少人大讚麵質好，食到最後都依然彈牙，湯底濃而不膩，又可以追加溏心蛋。小編搵日都要去試下！

^{圖片來源：toptoptang @Openrice}

麵駅
地址：上環永樂街1-3號世瑛大廈7樓703室
FB：www.facebook.com/Vieilles-Vignes

9. 勁厚3層班戟甜品
有無甜品食？梗係有啦！喺遠少少嘅上環普慶坊就有一間食超厚班戟嘅餐廳。你睇下個班戟幾厚，唔止有3層，仲要每一層都成1cm厚，真係睇見都想食！班戟有多種口味，最出名嘅係伯爵茶味！每層班戟之間原來仲加咗藍莓，有驚喜！班戟食落好軟稔，又唔會太甜。如果驚肥，都係約多個甜姐兒一齊食好啲呢！

^{圖片來源：angryangmo @IG}

3rd Space
地址：上環普慶坊22A太慶大廈地舖
FB：www.facebook.com/3rdspacehk

10. 本地抹茶甜品店始祖？
近幾年抹茶甜品店愈開愈多，食物種類又大同小異，已經分不清先後嚕。小編喺2012年嘅時候已經嚟過呢間以「茶」為主嘅cafe，所以呢度絕對可以稱得上係本地抹茶甜品嘅始祖。

飲品好特別，以呢杯 Matcha Genmaicha Marone 為例，不太甜，當中加入咗玄米茶作調配，保留到抹茶原本嘅沉實香濃。意外發現，原來抹茶同豆奶都夾到！另一必試嘅係「Matcha Sizzling Brownie 抹茶布朗尼」！Brownie 用鐵板上，伴上雲呢拿雪糕。當你將旁邊嘅抺茶醬倒向鐵板上，就會傳嚟「滋啦滋啦」嘅聲音。食嗰時一啖 Brownie，一啖雪糕，一冷一熱，正！

^{圖片來源：搵食有僑 Facebook}

川善茶居
地址：上環永樂街50號昌盛大廈5樓
FB：www.facebook.com/Sinmei-Tea

更多抹茶甜品：
抹茶粉絲必試的抹茶甜品
搵食至上　令人失控的抹茶風

你係咪從來都唔發覺上環係有咁多好嘢食呢？宜家先知都唔遲嘅！如果你知道有邊啲其他區有好嘢食，又或者你想知其他區嘅搵食攻略嘅話，就記得，記得，記得留言同小編講喇～報料都得架！

相關文章：
香港好去處深入西環尋找8大必試新舊美食

Edited by CLASSES

從我的 iPhone 傳送

老花筆記本

2016年7月29日星期五