香港好去處-深入屯門食好西-試盡13間屯門特色小店
上次食勻元朗之後，今次就去屯門。如果你只係識去嗰幾間連埋一齊嘅商場搵食，或者係唔少人都知嘅龍門居，咁你今次一定要跟住我呢位 CLASSES 最為食小編去食好西喇！
1. 人氣足料章魚小丸子
講人氣，呢間賣章魚小丸子嘅小店一定係最爆。新店一曝光就吸引咗唔少屯門區內外嘅人慕名而去！老闆做到無停手，人龍更加係愈來愈長，後來仲要施行「人潮管制」措施——截龍。不過，就算截咗，老闆都依然做個不停到夜晚11點幾，最後個位足足等咗3個鐘先食到！章魚小丸子有4款口味：原味、蟹子、明太子同激多蔥。吸引嘅地方係粒粒都成個乒乓波咁飽滿，同日本食嘅一樣足料！蟹子章丸燒最特別，小編超享受每粒蟹子喺嘴內爆開嘅感覺，好刺激！每粒章魚小丸子都有好大粒章魚肉，木魚絲又多，令人好滿足！唔怪得啲人排咁耐都要食！老闆唔想大家排咁耐，所以營業時間唔定，大家去之前，記得上FB睇清楚喇！
圖片來源：屯の大阪章魚燒 @FB；yuenman_0303 @IG
屯の大阪章魚燒
地址：屯門青菱徑9號華利大廈商場地下11號鋪
FB：www.facebook.com/tmtakoyaki
2. 你「蒜」夠未？
雖然蒜係重口味食物，食得多嘅話，一張開口，人哋聞到都會避開。不過屯門有間小店偏偏就靠「蒜」而出名。小店最矚目嘅就係將大量蒜茸放落鐵板上面同肉類快炒，客人可以自選配料，肥牛、魷魚、飯同麵都有，爆發出嘅蒜香真係隔幾條街都聞到呢！咁吸引，又點會唔食呢？之前係車仔檔，宜家就入舖，仲有位坐……今次真係有排「蒜」喇！
圖片來源：hugestomach @IG；moon_usako @IG
蒜爆王
地址：屯門田景路31號良景廣場地下良景市集118號鋪
FB：www.facebook.com/蒜爆王
3. 魚生迷打卡必到點
最近和風熱烘烘，海膽同魚生同樣得人鍾意，唔怪得香港嘅日式放題店愈開愈多，愈做愈旺啦。有時，胃口唔係好大，但就係想食下三文魚呀、海膽嚟滿足下欲望。呢間日本料理店舖嘅出品就啱曬喇！海膽三文魚卷，細細件壽司包住一嚿三文魚，上面仲要舖埋海膽，仲正過食手卷！勁足料，食落鮮味十足……食之前就梗係要影返張相打卡，話畀人知食咗好嘢啦！
圖片來源：Priestess @OP
鮨亭日式料理
地址：屯門青善街22號康景花園地下3-4號舖
FB：www.facebook.com/鮨亭日式料理
4. 咖啡小姐治癒情傷
平時飲咖啡，一為上癮，二為提醒。但係屯門有位咖啡小姐就話你知，咖啡可以醫情傷！Miss Coffee 呢度提供嘅特飲真係夠特別，有「life」、「Freedom」、「苦戀」同「失戀」……失戀時嘅你，雖然好傷心，但嚟到呢度，小編覺得你一定忍唔住點杯「失戀」嚟飲。因為，失戀嘅人總係覺得係最慘，就算呢杯「失戀」味道再苦，佢哋都唔會覺得苦。話唔定飲完之後，佢哋會好返！（失戀咖啡係苦，那苦戀咖啡會更苦嗎？）Café仲有其他咖啡同輕食，好適合平時去Hea架！
圖片來源：Seobin @OP
Miss Coffee
地址：屯門青柏徑6號鹿苑地下18號舖
FB：www.facebook.com/misscoffee0609
5. $100蚊有找 親民價嘆西餐
喺屯門，想食西餐通常都係去連鎖店，但係價錢貴之餘，又唔好味。最近就有網民發現有間西餐茶座，以平民價就可以食到德國鹹豬手、燒春雞同埋各類鐡板餐，西冷都係$98，仲可以揀配飯、意粉或薯條，包熱飲！真係抵到好吸引呢。想食，就記得夜晚6:30晚市先去喇！
相片來源：屯門金莎冰室燒烤茶座
屯門金莎冰室燒烤茶座 Sariel's restaurant
地址：屯門楊小坑村20號E地鋪（山景景榮樓側）
FB：www.facebook.com/屯門金莎冰室燒烤茶座-Sariels-restaurant
6. 創新菜式勁呃Like
鹽焗雞、炸雞、乞丐雞大家都食過，咁賣相獨特，味道又好嘅「鋼管雞」，CLASSMATES又聽過未呢？呢間餐廳原來係食火鍋同雞煲出名，而最近就被街坊發現有新菜式，就係「鋼管雞」。用枝鋼管穿住成隻雞，咁樣「棟」喺度嘅雞又幾型喎。原來台灣早幾年已經有呢個菜式，香港就唔多覺有喇。食過嘅人都話有驚喜，幾好味。為食小編就覺得淨係用嚟呃LIKE都夠爆啦！
圖片來源：屯門搵食地圖 @FB
良景美食
地址：屯門新平街2號屯門工業中心b座地舖
FB：www.facebook.com/leungkingrestaurant
7. 超級勁勁勁勁大隻炸髀
係咪每一區都會有間出名食炸雞髀嘅餐廳呢？之前幾期【香港好去處】都有食炸髀嘅推薦食店，嚟到屯門一樣有呀！你睇下，呢隻雞髀真係大隻到唔識形容，小編驚訝同詞窮到只可以用「超級」再加4個「勁」字去表達呢隻炸髀究竟有幾大！雞髀唔只大隻，仲好juicy，肉又好嫩滑，咬完一大隻，超滿足！炸髀有炸粉版揀架！快餐飯一樣勁大碟，芙蓉蛋飯仲大過2塊臉！
圖片來源：Dan Choy @FB
發發快餐
地址：屯門鄉事會路2A號H.A.N.D.S S區2樓S-208號舖
8. 最新台韓小食
率先打入香港嘅台式街頭小食係炸雞排，而屯門呢間小店就與時並進，引切當地最新最潮嘅芝心炸雞扒！雞扒炸粉夠薄，咬落去超脆；都未咬到中間，就已經差啲畀爆出嚟嘅芝士燙傷嘴唇呢。而另一樣受歡迎又可以填飽肚嘅就係手抓餅喇！呢度啲手抓餅有超過20種配料揀，豐富過台灣好多呢！而店主夠新意，知道香港盛吹韓風，就提供埋泡菜做配料！又真係幾夾喎！
圖片來源：rainiemonz ＠OP
5度台式手抓餅專門店
地址：屯門龍門居地舖37號舖
FB：www.facebook.com/5度手抓餅-台式飲品專賣店
9. 估佢唔到咖啡店
睇到個名，你就會估佢係咪啲貓貓 Café？呢度唔係貓Café，但都同「貓」有關嘅。咖啡店專賣靚咖啡，例如優質嘅麝香貓咖啡，全部由印尼入口，飲落咖啡味香濃。不過，鍾意食甜品嘅小編更加鍾意咖啡店獨有嘅蛋糕甜品。鹹焦糖拖肥日式芝士卷雖然睇上去個樣普遍啲，但估唔到芝士味都幾濃，蛋糕又軟熟，唔乾又唔會太濕，啱啱好；表面嗰層焦糖鹹鹹哋，令味道層次提升咗，甜甜鹹鹹咁，幾得意！
圖片來源：糖小妹 @OP
銅貓咖啡
地址：屯門屯門市廣場一期1樓售物亭C號舖
FB：www.facebook.com/CopperLuwak
10. 特色魅力窩夫
抹茶紫薯依然係甜品界殿堂級人馬，只要有佢哋嘅蹤影，食客都避唔到佢哋吸引力。去「嘆甜品」梗係為咗嘆返個美味，食完好滿足嘅甜品啦！呢度啲甜品好吸睛，除咗有紫薯同抹茶元素，甜品師仲會花心思設計伴碟。好似呢個紫薯窩夫，親手將紫薯蓉同忌廉混合成紫薯忌廉，上面加埋紫薯肉同紫薯乾，成個甜品都好「紫薯」，送到客人前，師傅就會喺碟上空位用朱古力醬畫卡通貓，超有心呢。除咗紫薯，仲有其他特別嘅窩夫，好似Baileys朱古力醬忌廉窩夫、北海道芝士蛋糕鮮果窩夫、抹茶麻糬紅豆鮮忌廉窩夫同焦糖脆脆花生醬甜奶鮮忌廉窩夫。
圖片來源：yuen429 @IG
嘆甜品
地址：屯門井財街15號金銘大廈地下4號舖
FB：www.facebook.com/tandessert
11. 夏日炎炎食火箭冰
天氣咁熱，梗係要食啲冰嚟降溫啦。細細杯刨冰點夠喉呢，呢個成枝火箭咁大嘅刨冰就似樣喇！餐廳將佢命名做「踏雪尋莓」，其實係士多啤梨刨冰。啲冰加入咗士多啤梨汁（有果酸味，應該係用新鮮士多啤梨榨成）同煉奶，味道好好，唔好過甜。小編最鍾意個賣相，成座冰山咁，勁有氣勢，呃LIKE最掂！都係$30夠哂真材實料，真係幾抵食！
圖片來源：thyrosanna @IG
糖樓甜品屋
地址：屯門美樂花園地下64號舖
FB：www.facebook.com/糖樓
12. 街坊宵夜甜品吹水點
雖然新開，但當街坊介紹咗之後，就已經有好多人話宵夜都去嗰度。因為呢度唔係淨係食甜品，仲有小食，好似雞翼尖，吹水嗰陣真係一流！主打可麗餅crepe同美式班戟，前者薄身啲，即係平時食開嗰種班戟，加nutella醬同焦糖脆脆無得彈；後者就厚啲，好似熱香餅咁，有口感啲。
Crepe N Cream
地址：屯門井財街9號錦發大廈地下20B鋪
FB：www.facebook.com/crepencreamcafe
13. 漏網之魚！高質家庭式西式甜品屋
呢間小店差啲連小編都睇漏咗！餐廳開喺近屯門碼頭，唔係去開／住嗰邊都唔會發現到。小編收到報料話呢度嘅甜品蛋糕好正，而且價錢合理，咁梗係要同大家分享啦！好味嘅拿破崙一啲都唔易整，但呢度嘅出品唔單止新鮮，每日喺店內製造，食落仲好好鬆脆，中間啲忌廉又夠滑，加埋上面超甜超大塊嘅芒果，真係好正！唔止芒果味，呢度仲有紫薯味、士多啤梨味同焦糖合桃味，選擇多過出面啲貴價餅店呢！
聽講呢度嘅師傅縱橫餅界30幾年，以前仲曾經喺高級酒店做過行政餅廚，原來來頭咁勁，唔怪得街坊勁讚出品啦！除咗拿破崙，仲有其實時下好hit嘅甜品：窩夫、心太軟、梳乎厘、芝士撻同埋唔同款式嘅切餅！另外，甜品店仲有飽肚鹹點供應，好似熱狗、漢堡……啱曬一家人去HEA去食啦！
圖片來源：yemenikwan @OP；lol.wtfoodbox @IG；Jason.pastries @IG
Jason Pastries
地址：屯門湖翠路138號啟豐商場地下24號鋪
FB：www.facebook.com/Jason.pastries
係咪愈睇愈想食呢？咁就唔好諗咁多啦，快啲入屯門食返轉喇！因為呢度啲小店會愈開愈多，動作慢啲就食唔切架喇！
唔好錯過更多好去處：
【香港好去處】元朗搵食Trip 邊走邊食12個好介紹
【香港好去處】沙田大圍-新舊美食11個好介紹
【香港好去處】走進西灣河 太安樓 冷氣叮叮一日遊
【香港好去處】上環10間必食小店
【香港好去處】走入大埔密密食
【香港好去處】美孚荔枝角邊走邊食
Edited by CLASSES
從我的 iPhone 傳送
從我的 iPhone 傳送
沒有留言:
張貼留言