新華社胡亂放箭

新華社英文網在十月二十五日突然發表一篇署名Yan Hao嘅文章，題為Hong Kong Tycoons reluctant to take side amid Occupy Turmoil，文章主要評述董建華在十月二十四日召開記者會挺梁，中間筆鋒一轉，指亞洲首富李嘉誠雖曾發表聲明請學生回家，勿使今天的激情變成明天的遺憾，但李嘉誠冇清楚表明對佔中嘅立場咁話，文章又指香港畢菲特李兆基、亞洲糖王郭鶴年及九倉吳光正對佔中一直保持沉默。呢篇英文評論上網幾小時就被抽起刪除，但傷害已生，訊息非常清楚，就係香港大亨，無論有冇靠共產黨或共產中國發達，都要回到中央這一邊來，要公開大力反佔中。
碰啱早前梁振英講14K（月薪1,800美元之人），聞名國際，出名到被諾貝爾經濟學獎得主，美國著名自由派普林斯頓大學教授克魯明在「紐約時報」點名批判，呢位Yan Hao之言，更令人產生一個印象，中央、特區政府與香港富商會聯手推動假普選。
新華社署名文章出台，並非「蘋果日報」咁鬆散，一定要由上司、上司嘅上司驗屍咁驗，先至可以發表，斷不可能話呢位Yan Hao年資淺，唔識世界。公關C以前在「南華早報」做記者，佢嘅by-line（署名報導）你估咁易見報乎？公關C憶述話：「起碼有三個上司睇過，而且仲要改寫幾次！」Yan Hao之評論，絕對係有的放矢，不過佢及上司實在有眼不識泰山，亂咁射箭。四位被點名富商有兩大特點，一係不靠中共／中國發達搵銀，而係發大達之後先至回國投資，二係佢地與內地有起碼三四十年關係，動搖不得。四人之中，郭鶴年家族與內地有最深根源，「文匯報」就曾寫過周恩來好信郭家，曾委託郭家在全世界迂迴買糖運回內地，以打破西方聯手制裁，1989年發生六四事件之後，各地外資投資暫時停頓，但嘉里在北京興建之China Trade Centre全力趕工，當時一位賓架曾向左丁山透露：「我地美國總部驚驚地，有人提議暫緩貸款，你話點呢？」當時左丁山同佢講：「政治還政治，郭家與中共好有淵源，佢地在艱難時期支持中央，他日必有好處。」果然，後來香格里拉酒店在中國遍地開花，香港中國銀行大廈落成，嘉里係第一批大租客呢。郭鶴年今年91歲，在上海與江澤民市委書記及朱鎔基市長交往之時，中聯辦主任張曉明不知在那裏當小官，新華社批評佢，真是哈哈哈。

從我的 iPhone 傳送

老花筆記本

2014年10月31日星期五