熱血時報 | 升中叩門七件事你要知 | 戴Sir | 專欄部落
升中放榜，祝福各位家長！
本人任職 BAND 1 中學，年年都好多叩門表，但其實未睇表已經篩走一批學生。近年我見到唔少家長做錯事，令到小朋友冇得面試或者未面試已經衰左。
若你有朋友需要叩門的話，歡迎你FORWARD/SHARE/TAG 俾佢地，請喺叩門交表及面試嗰陣，都要注意以下7項死罪：
1. 請勿送禮：除咗紅酒香煙唔送得之外，亦唔好將利是或西餅卡夾喺申請表，近年太多呢啲 case，所以校務處收表時一定 check。若發現份 FORM 附有金牛之類物體，校方反應就好無奈，所以嘢會退番俾你之餘，小朋友一定會被列入黑名單；
2. 請收起電話：俾小朋友用電話玩 GAME，老師見到即死；家長講電話激動太大聲，老師會定性你無家教即死；巴蕉扇果啲都最好收埋啦^^。另外唔好拎你部電話 ZOOM 人哋份申請表偷影，若要人不知，唔好太低B；
3. 請勿要求小學老師陪同叩門：我知某啲弱勢學校（特別係村校），教職員會陪同家長學生叩 BAND 1 門，但唔係間間小學都會咁做。千奇唔好喺中學校園打電話返小學鬧啲老師唔陪你嚟，我哋一聽到一定BLACKLIST；
4. 唔好插手面試：我知小學及幼稚園面試好多時係家長陪同，請勿強求家長陪同面試，就算學校俾你咁做都一定 FAIL 你；另外面試係冇得揀老師的；仲有，學校唔用普通話面試唔係歧視，千奇唔好因為咁而投訴，即死。補充多句，我知有學校會提供簡體版，但嗰啲我相信唔係 BAND 1 中學，大部分 BAND 1 學校中文卷係繁體字，切勿要求校方提供簡體版本，校方會拒絕之餘，你個機會亦會凍過水；
**請注意；小朋友面試完話你知表現唔好，請勿情緒激動甚至鬧老師。其實小朋友覺得 IN 得唔好啫，可能佢得咗呢~你鬧一鬧得左都會變唔得~
5. 面試由入門口嗰刻開始：若你對校工講粗口或呼呼喝喝，又或者去到洗手間偷廁紙、洗手液或整到好 DIRTY，校工係知的。排隊交表時打尖一定係唔可以！我知條隊係好長，但因為校務處要 CHECK 清楚唔會收到任何禮物，俾啲耐性。附加一句隨地吐痰都唔好丫，學校周圍有閉路的，THANKS！
6. 請勿交過厚CV（其實係叫PORTFOLIO）：20張雙面已經係極限，我知好多家長聽啲機構講CV至少50版雙面，其實中學係唔需要的；
7. 捉緊時間：我知某啲學校早去早著數遲去無料到，但千奇唔好將你架車亂咁泊喺學校門口，甚至有啲家長傻更更泊架車塞住前往學校出入口；另一個捉緊時間嘅要點係今年屯門、沙田、東區和南區中學校長已經達成「君子協定」，不收同區叩門生。若你喺上述區位叩門就快手啲去其他學校，遲咗去就可能冇咗個機會，至於應否跨區叩門，有多個因素需要考慮，請預先同老師、屋企人及小朋友商量。
從我的 iPhone 傳送
